Трамп Путиндан хафсаласи пир бўлганини очиқ тан олди
АҚШ президенти Доналд Трамп Россия ва Украина ўртасида давом этаётган можаро ҳақидаги фикрларини яна бир бор ошкор қилди. У 14 октябрь куни Оқ уйда журналистлар билан суҳбатда Россия раҳбари Владимир Путиндан ҳафсаласи пир бўлганини таъкидлаб, бу уруш унинг кўз ўнгида “беҳуда ва ҳалокатли жараён”га айланганини билдирди, деб ёзди CNN.
Трамп таъкидлашича, у Путин билан яхши муносабатларга эга бўлган ва бу алоқа ҳали ҳам маълум даражада сақланиб қолган бўлиши мумкин. Аммо АҚШ президентининг фикрича, Москва раҳбари урушни тўхтатиш бўйича аниқ қарор қабул қилиши лозим.
— Менинг ҳафсалам пир бўлди, чунки Владимир билан муносабатларимиз ҳақиқатан ҳам яхши эди. Аммо у бу урушни якунлаши керак. Ҳозир Россияда одамлар бензин учун узун навбатларда туришяпти. Бу иқтисодий инқирознинг бошланиши бўлиши мумкин, — деди Трамп.
Унинг таъкидлашича, Путин урушни тўрт йил эмас, бир ҳафта ичида тугатиши мумкин бўлган. Аммо у шундай қилмаган ва бу қарор Россиянинг ташқи ва ички имижига жиддий таъсир кўрсатган.
— Мен тушунмайман, нега у бундай урушни давом эттиряпти. Бу тўрт йиллик можарони бир ҳафтада ҳал қилиш мумкин эди. Улар 1,5 миллионга яқин аскарини йўқотди. Бу Путин учун ҳам, Россия учун ҳам оғир йўқотиш, — деди Трамп.
Сиёсатчининг сўзларига кўра, узоққа чўзилган можаро Путиннинг халқаро майдондаги мавқеини сусайтирган ва уни “жуда ёмон кўринишда” намоён этмоқда.
— У буни тезда тугатиши мумкин эди. Аммо у шундай йўл тутмади. Менимча, уруш унинг давлат раҳбари сифатидаги обрўсига жуда салбий таъсир кўрсатяпти, — дея қўшимча қилди Трамп.
Шунингдек, АҚШ президенти 17 октябрь куни Вашингтонда Украина президенти Владимир Зеленский билан бўладиган учрашув ҳақида ҳам тўхталиб ўтди. Унинг айтишича, Зеленский музокараларда қурол-аслаҳа масаласини кўтаради.
— Жума куни у келади. Ва мен у нима демоқчи эканини биламан — у қуроллар ҳақида сўрайди. У “Томагавк”ларни хоҳлайди. Бизда улар етарли миқдорда бор. Ҳатто Аргентинага ҳам керак бўлиб қолар, балки, — дея Трамп матбуот анжуманида иштирок этган Аргентина президенти Хавьер Милейга шўхлик билан мурожаат қилди.
Трампнинг бу баёноти АҚШ ва халқаро ОАВда катта муҳокамага сабаб бўлди. Айрим таҳлилчилар унинг сўзларини Россияга босимни кучайтириш сифатида баҳоласа, бошқалар Трампнинг Путин билан муносабатларига ишора қилиб, бу орқали у ички сиёсий обрўсини мустаҳкамламоқчи эканини таъкидлашди.
Шундай қилиб, АҚШ президентининг навбатдаги чиқиши Россия–Украина можароси бўйича янги баҳсларга туртки бўлди. Унинг “Путин бу урушни тез тугатиши мумкин” деган гапи эса сиёсий доираларда катта резонанс келтириб чиқарди.
