НАТО бош котиби Россия сувости кемаси устидан кулди
НАТО бош котиби Марк Рютте 13 сентябр, душанба куни Франция қирғоқларида аниқланган, носоз ҳарбий сувости кемаси туфайли Россиянинг устидан кулди. Бу ҳақда Euronews хабар берди.
«Ўрта Ер денгизида Россия ҳарбий-денгиз кучлари деярли қолмади. Фақат ёлғиз, бузилиб қолган Россия сувости кемаси патрулликдан сўнг оқсоқланиб уйига қайтяпти», — деди Рютте Словенияда сўзлаган нутқида.
НАТО бош котиби Том Клэнсининг 1984 йилда чоп этилган «Қизил Октябр учун ов» романини тилга олди, бу роман хорижда фитначилар томонидан ўғирлаб кетилган совет атом сувости кемасини қидиришга бағишланган. «Вазият қандай ўзгарди», деди Рютте. «Энди бу кўпроқ энг яқин механикни овлашга ўхшайди».
9 октябр куни НАТОнинг оператив денгиз кучлари Россиянинг қанотли ракета ташувчи «Новороссийск» сувости кемаси Франциянинг Бретан минтақаси қирғоқлари яқинида сув юзасига чиққани ва кейинчалик алянс кузатувига ўтказилгани ҳақида хабар берди.
Нидерландиянинг Nl Times нашрига кўра, сув ости кемаси Ўрта Ер денгизида жанговар навбатчилик қилаётганида ёнилғи сизиб чиққан.
Бироқ Россия Қора денгиз флоти матбуот хизмати сувости кемасининг бузилиши ва фавқулодда вазият юзага келгани ҳақидаги маълумотни рад этди. Унинг таъкидлашича, «Новороссийск» Буюк Британия ва Франция ўртасидаги Ла-Манш бўйлаб «халқаро денгизчилик қоидаларига мувофиқ» сув юзасидан ўтмоқда.
