Россия 30 йил аввал чўккан Estonia паромидан жосуслик базасини жойлаштирган
Бу ҳақда Германиянинг WDR, NDR ва Süddeutsche Zeitung нашрлари томонидан қўшма суриштирув эълон қилинди.
Estonia пароми 1994 йил сентябр ойида Таллин-Стокголм йўналишида сузиб кетаётганида Финляндиянинг Уто оролидан 35 км узоқликда бўрон сабабли ҳалокатга учраган. Ҳодиса оқибатида 852 киши ҳалок бўлган.
Ҳалокатдан сўнг Финляндия, Эстония ва Германия ҳукуматлари у жойга боришни қатъиян тақиқлаган. Мазкур чекловдан фойдаланган ҳолда Россия разведка хизматлари чўккан кема ҳудудида махфий сувости ускуналарини ўрнатгани тахмин қилинмоқда. Бу қурилмалар дронлар ва сувости роботларини бошқариш, шунингдек NATO ҳарбий кемалари ва сувости кемаларининг кузатиш учун хизмат қилган.
NATO мамлакатлари бу ҳудудда Россия сувости кемаларининг фаоллиги ортганини қайд этган. Шунингдек, сўнгги йилларда Литва, Латвия, Буюк Британия ва Ирландия ҳудудларида номаълум сув ости датчиклари топилган. Улар Россияда ишлаб чиқарилган бўлиши мумкинлиги айтилмоқда.
