АҚШ санкциялари туфайли “Лукойл” хориждаги активларини сотишга қарор қилди
Россиянинг энг йирик нефт компанияларидан бири “Лукойл” ўзининг хориждаги активларини сотишини эълон қилди. Бунга сабаб сифатида “бир қатор давлатлар томонидан компаниянинг ўзи ва унинг шўба корхоналарига нисбатан жорий этилган чеклов чоралари” кўрсатилди. Бу ҳақда компаниянинг расмий сайтида эълон қилинди.
Компания маълумотига кўра, активларни сотиш жараёни АҚШ Молия вазирлигининг Ташқи активларни назорат қилиш бошқармаси (OFAC) томонидан берилган лицензия доирасида амалга оширилмоқда. Ушбу лицензия “Роснефть” ва “Лукойл” билан боғлиқ битимларни босқичма-босқич тўхтатишни тартибга солади.
ОFAC “Лукойл” билан боғлиқ барча операцияларни тугатиш учун бир ой муддат белгилаган ва бу муддат жорий йилнинг 21 ноябрида якунланади. Мазкур қоидалар “Роснефть” компаниясига ҳам татбиқ этилган. Чекловлар, шунингдек, уларнинг 50 фоиздан ортиқ улушга эга шўба корхоналарига ҳам тааллуқли ҳисобланади.
22 октябр куни АҚШ Россияга қарши янги санкциялар жорий этилганини эълон қилган эди. Бунга сабаб сифатида Москванинг Украинадаги урушни тугатиш бўйича “тинчлик жараёнига жиддий қизиқиш билдирмагани” кўрсатилган.
