Луврдаги ўғрилик иши бўйича яна бир шахс қўлга олинди
Лувр музейидаги Аполлон галереясидан императорлик заргарлик буюмларини ўғирлаш иши бўйича тўрт нафар гумонланувчидан учинчиси қўлга олинди. Бу ҳақда BFMTV хабар берди.
Қайд этилишича, эркак “Лувр командоси” деб аталувчи гуруҳ аъзоси бўлиши мумкин ва у талончиликда бевосита иштирок этган, деб тахмин қилинмоқда. Уни сўроқ қилинган, икки нафар ҳамроҳи эса бир кун аввал расман айбланиб, ҳибсга олинган.
“La Chaîne Info” телеканали кеча, 29 октябрь куни ушбу иш доирасида тўрт киши ҳибсга олинганини хабар қилган бўлса, RTL канали яна беш нафар янги гумонланувчи қўлга олинганини маълум қилган.
Париж прокурори Лор Бекконинг маълум қилишича, полиция талончиларга музей ходимларидан бири ёрдам берган бўлиши мумкинлигини ҳам текширмоқда.
Эслатиб ўтамиз, жорий йилнинг 19 октябрь куни иш вақти давомида ниқоб кийган жиноятчилар Луврга кириб, императорлик коллекциясига мансуб тўққизта экспонатни, жумладан, Наполеон ва унинг рафиқаси Жозефинага тегишли заргарлик буюмларини ўғирлаган эди. Ўғриликдан етган зарар 88 миллион еврога баҳоланганди.
Бир ҳафта ўтиб, Луврдан заргарлик буюмларини ўғирлашда гумон қилинаётган тўрт кишидан икки нафари қўлга олинган. Улардан бири Париждаги Руасси – Шарль-де-Голл аэропортида, Жазоирга учадиган самолётга чиқиш пайтида ҳибсга олинган. Иккинчиси эса Сена-Сен-Дени департаментида қўлга олинган.
Париж прокуратураси гумондорларнинг қўлга олинганини тасдиқлаган. Лор Бекко, шунингдек, полиция кузатув камераларидан фойдаланган ҳолда, жиноятчиларнинг икки скутердаги ҳаракат йўлини аниқлашга муваффақ бўлганини билдирган эди.
