Луврда ўғирлик қилган жиноятчилар қимматбаҳо тақинчоқларни Исроилнинг CGI Group хавфсизлик компаниясига “даркнет” орқали сотмоқчи бўлган
Бу ҳақда Bild нашри компания раҳбари Цвик Навенинг сўзларига таяниб хабар бермоқда.
Навенинг маълум қилишича, талончилик содир бўлганидан беш кун ўтиб, ўзини «жиноятчилар вакили» деб таништирган бир киши компания билан боғланган ва Луврдан ўғирланган санъат асарларини сотиб олиш масаласини муҳокама қилишни таклиф қилган. У жавобни 24 соат ичида беришни талаб қилган.
Бундан бир муддат олдин Лувр билан алоқадор номаълум шахс CGI Group’га мурожаат қилиб, ўғирланган тақинчоқларни топишда ёрдам сўраган. Жиноятчилар вакили ўзида ўғирланган буюмларнинг камида бир қисмини борлигини тасдиқлаганида, компания дарҳол Франция ҳукуматини хабардор қилган.
«Афсуски, бюрократик кечикишлар натижасида санъат асарларининг ҳеч бўлмаганда бир қисмини қайтариб олиш имконияти бой берилди», — деди Наве.
19 октябр куни ниқоб таққан жиноятчилар Луврга кириб, императорлик коллекциясига тегишли тўққизта экспонатни, жумладан Наполеон ва унинг рафиқаси Жозефинага тегишли заргарлик буюмларини ўғирлашганди. Ўғирлик натижасида етказилган зарар 88 миллион евро деб баҳоланмоқда. Ўғирликда гумонланувчи сифатида 7 киши қўлга олинган.
