Блогернинг кўп хотинлилик тарғиботи жазо билан якунланди
Ўзбекистон ҳукумати кўп хотинлиликнинг тарғиботига қарши кураш бошлади. Бу ҳақда UPL нашри хабар берди. Нашр маълумотларига кўра, жорий йил июн ойида ўзбекистонлик Х.Ж. ўзининг Instagram саҳифасида кўп хотинлиликни тарғиб қилиш билан шуғулланган.
Ёш йигитнинг саҳифасида 53 мингдан ортиқ обуначи бор. Х.Ж. 14 июн куни бир видео эълон қилиб, агар қиз уни севсагина, маҳрга унга иккинчи хотин сўрашини айтган. Ушбу видео ижтимоий тармоқ фойдаланувчилари орасида катта танқид ва муҳокамаларга сабаб бўлди.
Натижада, бу ҳолат ҳуқуқни муҳофаза қилиш органлари диққатига тушди. Ёш блогер ҳуқуқни муҳофаза қилиш органлари билан суҳбатда ўз айбини тан олди.
Эркак ўз қилмишининг ноқонуний эканлигини билмаганини айтди ва суддан жазони енгиллаштиришни сўради ҳамда ўзининг оғир аҳволи ҳақида маълумот берди. Суд қарори билан Х.Ж. 5 миллион 625 минг сўм миқдорида жаримага тортилди.
Маълумот учун: Маҳр – бу исломий оилавий ҳуқуқ бўйича эр томонидан никоҳ тузилганида хотинга берилиши лозим бўлган мажбурий мулк.
