Италиялик журналист Европа комиссияси брифингида Ғазога оид савол берганидан кейин ишдан бўшатилди
Италиянинг Nova ахборот агентлиги мухбири Габриэле Нунциати Европа Комиссияси расмийларига Ғазо ҳақида савол берганидан сўнг ишдан бўшатилди.
Яқинда Брюсселга тайинланган журналист 13 октябрь куни бўлиб ўтган матбуот анжумани чоғида Еврокомиссия расмийларидан урушдан кейинги қайта қуриш учун товон тўлаш тамойиллари ҳақида сўради. Унинг эслатишича, ЕИ бир неча бор Россия Украинага етказилган зарарни тўлаши зарурлигини таъкидлаган ва бу ёндашув Исроилга ҳам тегишлими ёки йўқми, деб сўраган.
Комиссия матбуот котиби Паола Пигно бу борада изоҳ беришдан бош тортди.
Воқеадан бир неча кун ўтиб, Европарламентнинг Италиянинг чап қаноти вакили Гаэтано Педулла Нунциати ишдан бўшатилганини эълон қилди.
Журналистнинг ўзи бу маълумотни Анадолу агентлигига тасдиқлаб, воқеа тафсилотларини ошкор эта олмаслигини таъкидлади.
Урсула фон дер Ляйен бошчилигидаги Европа комиссияси Исроилни қўллаб-қувватлагани ва Исроилнинг Ғазо секторидаги ҳаракатларини сўзсиз маъқуллагани учун бир неча бор танқид қилинган.
