Оятулло Хоманаий намойишчиларга қарши қаттиқ чоралар кўришга чақирди — Тasnim
Эрон олий етакчиси бундай фикрни 3 январ генерал Қосим Сулаймоний ҳалок бўлганининг олти йиллиги муносабати билан ўтказилган учрашувда билдирди.
Оятулло Хоманаий ўз нутқида сўнгги кунларда мамлакатда юз бераётган воқеаларни “ички ва ташқи душманларнинг фитнаси” деб атаган ва “тартибсизликларни қўзғатувчилар”нинг ҳаракатларига қаттиқ қаршилик кўрсатишни талаб қилган.
«Биз душман олдида чекинмаймиз. Биз душманни тиз чўктирамиз. Миллий валютанинг қадрсизланиши ва беқарор валюта курси туфайли бозор савдогарларининг норозилик намойишлари оқланади, аммо тартибсизликларни қўзғатувчиларни ўз ўрнига қўйиш керак», — деган Хоманаий.
Оммавий намойишлар 28 декабр куни Теҳронда бошланди. Одамлар мамлакатдаги оғир иқтисодий вазият ва миллий валюта риалнинг кескин қадрсизланишига қарши норозилик акцияларини уюштиришди. Тадбиркорлар ҳам бу акцияга қўшилиб, норозилик сифатида ўз дўконларини ёпиб ташлашди.
Намойишчилар миллий валюта курсидаги тебранишларни жиловлаш учун ҳукуматнинг “зудлик билан аралашуви” ҳақидаги иқтисодий талаблар билан бирга, сиёсий талабларни ҳам илгари сурмоқда. Шунингдек, улар оятуллоҳ Хоманаийнинг суратларини ёқишмоқда. Акция иштирокчилари “Диктаторга ўлим!” ва “Озодлик” деб ҳайқирмоқда.
Митинглар ҳуқуқ-тартибот органлари билан тўқнашувларга айланиб кетди. Хавфсизлик кучлари намойишчиларга кўздан ёш оқизувчи газ қўлламоқда. Бундан ташқари, намойишчиларга қарши ўқотар қуроллар қўлланилаётгани хабар қилинмоқда.
