Россия АҚШдан Венесуэлага кетаётган танкерни таъқиб этишни тўхтатишни талаб қилди — The New York Times
Москва Вашингтонга дипломатик сўров юбориб, Эрондан Венесуэлага йўл олган Bella 1 нефт танкерини қўлга олишга уринишларни тўхтатишни талаб қилди, дея хабар бермоқда нашр манбаларига таяниб. Мурожаат 2025 йил 31 декабр куни кечқурун АҚШ Давлат департаменти ва Миллий хавфсизлик кенгашига етказилган.
АҚШ Эрон нефтини ташигани учун Америка санкцияларига тушган ушбу танкер ортидан қарийб икки ҳафтадан бери қувиб келмоқда. Кема Эрондан Венесуэлага йўл олган пайтда АҚШ ҳарбийлари Кариб денгизида уни тўхтатиб, текширишга уринган. Вашингтон танкерни текшириш халқаро ҳуқуқ доирасида амалга оширилганини билдирган, чунки кема амалдаги миллий байроқ остида сузмаган.
Бироқ таркибида Россия, Ҳиндистон ва Украина фуқаролари бўлган Bella 1 экипажи бўйсунишдан бош тортиб, Атлантика океанига қайтган. Кейинги кунларда кема экипажи Қўшма Штатларнинг таъқибидан ҳимояланишга уриниб, бортга Россия байроғи тасвирини чизган ва радиоалоқа орқали АҚШ Қирғоқ қўриқлаш хизматига Россия юрисдикцияси остида ҳаракат қилаётганини билдирган. Яқинда эса Bella 1 Россия Денгиз кемалари реестрида Marinera номи билан Сочи портида рўйхатдан ўтган ҳолда пайдо бўлган.
Шунга қарамай, америкалик амалдор NYT’га Трамп маъмурияти танкерни ҳануз “ноқонуний сузаётган кема” деб ҳисоблаётганини айтган, чунки АҚШ Қирғоқ қўриқлаш хизмати билан илк алоқада у сохта байроқ остида ҳаракат қилган.
Marinetraffic маълумотларига кўра, кема илгари Гайана байроғи остида сузган, таъқиб бошланган пайтда эса Панама байроғи остида қайд этилган.
