Tesla BYDга йўл берди: 2025 йилда электромобиль савдосида етакчи ким
2025 йил якунларига кўра, Илон Маскга тегишли Tesla дунёдаги энг йирик электромобиль сотувчиси мақомини бой берди. Trading Review хабарига кўра, компания етакчиликни Хитойнинг BYD корпорациясига топширди. Бу ҳақда kursiv.uz хабар беради.
Tesla’нинг чораклик ҳамда йиллик етказиб бериш кўрсаткичлари компаниянинг ўзи кутган даражадан паст чиқди. Бу ҳолат автомобиль ишлаб чиқарувчиси акцияларига босимни кучайтирди.
2025 йилнинг тўртинчи чорагида Tesla глобал бозорларга 418,2 минг дона электромобиль етказиб берди — бу ўтган йилнинг шу даврига нисбатан 16% кам. Кўрсаткич компания шакллантирган консенсус-прогнозга ҳам етмади.
Йил давомида Tesla етказиб беришлари 8,6% га қисқариб, 1,64 миллион донани ташкил этди. BYD эса ўсишни сақлаб қолди: 2025 йилда компания 2,26 миллион электромобиль сотди, бунда ҳам тўртинчи чорак, ҳам йил якуни бўйича ижобий динамика қайд этилди. Бироқ BYDнинг ўсиш суръатлари сўнгги беш йилдаги энг суст даражага тушгани таъкидланади.
2026 йилнинг илк савдо кунида Ню-Йоркда Tesla акциялари сессия бошида кўтарилиш билан очилган бўлса-да, етказиб беришлар бўйича маълумотлар эълон қилингани ва глобал электромобиль бозорида рақобат кучайгани фонида савдо жараёнида пасайиш ҳудудига ўтиб кетди.
