Хитойда интернет қаттиқ назоратга олинди: лицензиясиз янгиликлар қатъий тақиқланади

Хитойда онлайн ахборот маконида тартибни кучайтириш бўйича янги босқич бошланди. Пекин шаҳрининг киберхавфсизлик органлари интернетда лицензиясиз интервью ўтказиш, янгилик тўплаш ва уларни нашр этишни қатъий чеклашга киришди. Мақсад — ижтимоий тармоқлар ва сайтларда салбий кайфият, асоссиз ваҳима ҳамда фитна назарияларининг тарқалишини бартараф этиш.

Маълум қилинишича, Пекин Кибермакон маъмурияти 2025 йил декабрь ойида онлайн янгиликлар соҳасини қамраб олган бир ойлик махсус назорат кампаниясини бошлаган. Бу ташаббус қонунбузарликларни барвақт аниқлаш, расмий оммавий ахборот воситаларининг таъсирини ошириш ва соғлом ахборот муҳитини шакллантиришга қаратилган. Бу ҳақда Хитой Марказий Телевидениеси хабар берди.

Кампания доирасида қатор тақиқлар жорий этилди. Жумладан, лицензиясиз интервью олиш, янгиликларни йиғиш, таҳрирлаш ва тарқатиш, маълумотларни қасддан бурмалаш ёки контекстдан узиб кўрсатиш қонунбузарлик сифатида баҳоланади. Шунингдек, жамоатчиликни чалғитувчи аккаунтлар, сохта номлар ва манипулятив фотосуратлардан фойдаланиш ҳам диққат марказида бўлади.

Расмийларга кўра, мазкур чоралар интернет маконида ишончли ахборот устуворлигини таъминлашга қаратилган. Кампания “Тоза пойтахт — тоза манбалар, ҳақиқий овоз” шиори остида ўтказилиб, ноқонуний онлайн фаолиятларни тўлиқ аниқлаш ва бартараф этишни назарда тутади.

Шу билан бирга, Хитойда интернет назорати сўнгги йилларда изчил кучайиб бормоқда. Илгарироқ вояга етмаганларни онлайн таҳдидлардан ҳимоя қилиш бўйича алоҳида кампания бошланган, ҳақоратли контент ва киберҳужумларга қарши мониторинг ҳам кенгайтирилган эди. Янги қадамлар эса ахборот майдонида давлат назорати янада қаттиқлашишидан дарак беради.