Нотинч Теҳрон. Эрон Олий раҳбари ўзига яқин доира билан бирга қочишни режалаштираётгани ростми?
Эроннинг Олий раҳбари Али Хоминаий мамлакатдаги хавфсизлик кучлари намойишларни бостиришга қодир бўлмай қолиши, дезертирлик қилиши ёки намойишчилар томонига ўтиб кетиши эҳтимолига қарши эҳтиёт чораси сифатида мамлакатдан эвакуация қилиш режасини ишлаб чиққан, дея ёзмоқда Медуза нашри. Ғарб разведкаси тайёрлаган ҳисоботга кўра, Хоминаий ўзига яқин доира билан бирга қочишни режалаштирмоқда. Ушбу доирага 20 нафарга яқин шахс — жумладан, унинг ёрдамчилари ва оила аъзолари киради.
Нашр разведка тизимидаги манбага таяна туриб хабар беришича, мазкур захира режа Хаменеи ва унинг энг яқин ҳамфикрлари ҳамда оила аъзолари, шу жумладан ўғли ва эҳтимолий вориси ҳисобланган Можтабо Хоминаий ҳам қамраб олади. Исроил разведкаси ходими Бени Сабти, ислом инқилобидан сўнг Эронни тарк этган шахс сифатида, The Times нашрига берган изоҳида Хаменеи эҳтимолан Москвага қочиши мумкинлигини айтган. Унинг таъкидлашича, «у учун бошқа жой йўқ».
Декабрь ойи охирида Эронда миллий валюта курсининг кескин пасайиши ва нарх-наволарнинг жадал ўсиши ортидан оммавий норозилик намойишлари бошланган. Кейинчалик намойишчилар ҳокимиятни алмаштиришни талаб қила бошлаган, акциялар оммавий тартибсизликларга айланиб, ҳуқуқни муҳофаза қилувчи органлар билан тўқнашувларга олиб келган. Намойишчилар хавфсизлик кучларини жанговор ўқ-дорилар, кўздан ёш чиқарувчи газ ва сув пуркагичлардан фойдаланганликда айбламоқда.
АҚШда жойлашган эронлик инсон ҳуқуқлари ташкилоти баҳоларига кўра, намойишлар давомида 19 нафар тинч аҳоли ва хавфсизлик кучларининг бир нафар вакили ҳалок бўлган, камида 51 киши яраланган.
