Трамп Гренландия устидан назорат ўрнатиш ва NATO’ни сақлаб қолиш ўртасида танлов бўлиши мумкинлигини истисно қилмади
Доналд Трампнинг таъкидлашича, унинг президентлик ваколатларини халқаро ҳуқуқ эмас, фақат “ўз ахлоқи” чеклайди. «Битта чеклов бор. Бу — менинг ўз ахлоқим. Ўз ақл-идроким. Мени тўхтата оладиган ягона нарса шу. Менга халқаро ҳуқуқ керак эмас. Мен одамларга зиён етказишга интилмайман», — деди АҚШ президенти.
Трамп Тhe New York Times журналистининг «У учун қай бири муҳимроқ — АҚШнинг Гренландия устидан назорат ўрнатиши ёки NATO’ни сақлаб қолишми?» деган саволига тўғридан тўғри жавоб беришдан бош тортди, бироқ “танлов бўлиши мумкин”лигини тан олди.
Президент алянс АҚШ унда асосий таянч бўлмаса, амалда фойдасиз эканини очиқ-ойдин билдирган. «Менимча, биз ҳар доим Европа билан тил топишамиз. Уларни NATO’га кўпроқ маблағ сарфлашга, ЯИМни оширишга айнан мен мажбур қилганман», — деди Оқ уй раҳбари.
Сиёсатчи, шунингдек, АҚШнинг Венесуелада Николас Мадурони қўлга олиш операцияси Хитойнинг Тайван бўйича даъволарини амалга ошириши учун асос бўлди, деган фикрни ҳам рад этди.
«Бу Хитой Си Жинпиннинг ўзига боғлиқ. Лекин мен унга айтганман: агар у шунга ўхшаш иш қилса, мен бундан жудаям норози бўламан. Мен Си Жинпин бундай қилмайди, деб ўйлайман. Умид қиламан, у бундай қилмайди», — дея фикр билдирдиТрамп.
