Афғонистонда бомба портлади
Афғонистоннинг “Толибон” назоратидаги Кунар вилоятида урушдан қолган портловчи моддалар портлаши оқибатида камида икки нафар маҳаллий аҳоли вакили ҳалок бўлди. Бу ҳақда вилоят полиция бошқармаси хабар берди.
Маълум қилинишича, Нур Гул туманининг Мазар Дара қишлоғида урушдан қолган артиллерия снаряди портлаши натижасида бир нафар бола вафот этган, яна олти киши турли тан жароҳатлари олган. Шунингдек, маҳаллий манбалар Асмар туманида содир бўлган шунга ўхшаш ҳодисада бир нафар аёл ҳалок бўлгани, икки киши эса жароҳат олганини маълум қилган.
Полиция маълумотларига кўра, Нур Гул туманидаги портлаш 6 январь куни фуқаролардан бирининг уйида содир бўлган. Асмар туманида қайд этилган портлаш ҳам худди шу куни рўй берган. Жароҳат олганлар шифохонага ётқизилиб, ҳозирда шифокорлар назорати остида даволанмоқда.
Қайд этилишича, Афғонистонда урушдан қолган портловчи қурилмалар аҳоли, айниқса болалар ҳаёти учун жиддий хавф солиб келмоқда.
Бирлашган Миллатлар Ташкилотининг Болалар жамғармаси (UNICEF) маълумотларига кўра, мамлакатда ҳар ой камида 55 нафар инсон портловчи моддалар портлаши қурбонига айланади. Улардан 85 фоизини болалар ташкил этади.
