1 февралдан ID карталар электрон рақамли имзо билан берилади

Ўзбекистонда шахсни тасдиқловчи ҳужжатлар ва миграция жараёнларини рақамлаштиришнинг янги босқичи бошланмоқда. Президент Шавкат Мирзиёевнинг 2026 йил 19 январдаги қарорига мувофиқ, фуқароларга ID карта бериш тартибига муҳим янгиликлар жорий этилди.

Ҳужжатга кўра, 2026 йил 1 февралдан бошлаб Ўзбекистон фуқаролари биринчи марта ID карта олаётганда, электрон рақамли имзо (ERI) сертификати карта чипига бепул жойлаштирилади. Шу билан бирга, фуқаролар “Электрон ҳукумат” тизими фойдаланувчиларини идентификациялаш ягона ахборот тизимида (OneID) автоматик ва бепул рўйхатдан ўтказилади.

Мазкур тартиб ID карта эгаларига ҳужжатни олган заҳоти давлатнинг барча онлайн хизматларидан фойдаланиш имконини беради.

Эндиликда ERI олиш ёки OneID тизимида рўйхатдан ўтиш учун алоҳида равишда давлат хизматлари марказларига мурожаат қилиш талаб этилмайди.