“20 минг долларим ҳавога кетди” — АҚШга ноқонуний борган ўзбекистонликлар дуч келган қийинчиликлари ҳақида
АҚШга ноқонуний борган 44 нафар фуқаро 21 январь куни Ўзбекистонга қайтарилганди. Улар “Дунё” ахборот агентлигига берган интервьюларида Мексика орқали ўтган ҳақиқий йўллари қандай бўлгани, сафар қанча вақт олгани, эмиграцияга уриниш қанчага тушгани ва манзилда қандай қийинчиликларга дуч келганликлари ҳақида сўзлаб берди.
Маълум қилинишича, чартер рейс орқали қайтарилган фуқароларнинг кўпчилиги АҚШ давлат чегарасини ноқонуний кесиб ўтишга уринишдан сўнг узоқ вақт давомида миграция марказларида сақланган.
Ватанга қайтган фуқаролардан бирининг айтишича, кўпчилик кетаётгани учун қизиқиб улар билан йўлга чиққан. Бир ой йўл юриб, Мексикагача боришган. Бу вақт давомида улар кўп қийинчиликларга дуч келган, ўрмонлардан пиёда юрган.
“Кимнингдир ошна-оғайниси бўлиши мумкин, ‘ўртоқ, шунча пул топяпман’, дейиши мумкин. Уларга ишониш керак эмас. Мексика орқали боргандан кейин ҳам у ерда ишлаш, ҳужжатни ҳал қилиш жуда қийин. Бу йўл билан бориш арзимайди”, дейди ватанга қайтган йигит.
Унинг сўзларига кўра, АҚШга боришнинг ўзи 23 минг, 25 минг, 30 минг долларгачаборади. Айримлар бунинг учун 80 минг доллар ҳам тўлаган, бироқ мамлакатга кира олмай, Ўзбекистонга қайтиб келган.
У ватанга қайтганидан хурсандлигини, чунки АҚШга ноқонуний кириш ортидан қамалиб, бир неча йиллаб ўтирганлар ҳам борлигини билдирди.
“20 минг доллар пулимни ҳавога совуриб, уч ой қамалиб, депорт олиб, мана қайтиб келяпман”, деган яна бир фуқаро. У жуда қийналганини, АҚШга ноқонуний йўл билан боришни ҳеч кимга маслаҳат бермаслигини айтди.
“Берадиган овқатларини қўпол қилиб айтганда мол емайди-да, шуни бизлар едик”, дея хотирлаган у қамоқда бўлган пайтларини.
Агентлик хабарида маълум қилинишича, 21 январда амалга оширилган чартер рейс Ўзбекистон ва АҚШнинг тегишли идоралари ўртасида олиб борилган кўп ойлик мувофиқлаштириш ишлар натижасидир. Мазкур рейс кетма-кет 11-бўлиб, унинг доирасида репатриация қилинган фуқароларнинг умумий сони қарийб 700 нафарга етди.
Ўзбекистоннинг Америкадаги элчиси Фурқат Сиддиқов “Дарё” мухбирига берган интервьюсида ўзбекистонликлар учун АҚШ визасини соддалаштириш бўйича музокаралар бошланганини маълум қилганди. У аҳоли учун АҚШ виза режимини енгиллаштириш борасида мунтазам ҳаракат олиб борилаётганини, кутилган натижага эришиш эса осон кечмаслигини айтганди.
