Таълимга масъуллар қиморбоз бўлса, уқувчилардан нима кутамиз?

Улуғунор тумани Мактабгача ва мактаб таълими бўлими бошлиғи, унинг ўринбосари ҳамда 4 нафар мактаб директорининг чойхонада ноқонуний равишда қимор ўйнагани аниқланди.

Ҳужжатда ёзилишича, жиноят ишлари бўйича Балиқчи туман суди 2026-йил 30-январь куни Улуғнор тумани Мактабгача ва мактаб таълими бўлими бошлиғи Д.Р., унинг собиқ ўринбосари Т.Ў., шунингдек, тумандаги 5-мактаб собиқ директори Ф.У., 9-мактаб собиқ директори М.А., 19-мактаб собиқ директори М.Р., 25-мактаб директори Ш. Ё.га нисбатан қарор чиқарди. Мазкур маъмурий ишга тергов судяси А.Бегматов раислик қилди. Уларнинг 4 нафари аввал ҳам маъмурий жавобгарликка тортилган.

Суд қарорига кўра, Улуғнор тумани Мактабгача ва мактаб таълими бўлими бошлиғининг собиқ ўринбосари Т.Ў. 2026-йил 14-январь куни соат 21:30 лар оралиғида Балиқчи туманидаги “Абдухалил ота” чойхонасида танишлари Д.Р., Ф.У., М.А., М.Р. ва Ш. Ё.лар билан қонунга хилоф равишда ўртага 5000 сўмдан пул тикиб, 28 дона ўйин карталаридан фойдаланиб, қимор ўйинида иштирок этгани Балиқчи тумани ИИБ ходими томонидан аниқланган.

Ўша заҳоти ўйин даврасидаги 205 000 сўм, иштирокчилар ёнида бўлган жами 617 000 сўм пул ҳамда 28 дона ўйин карталари холислар иштирокида баённома орқали ашёвий далил тариқасида олинган.

Ҳуқуқбузар Т.Ў. суд мажлисида айбига иқрор бўлмаган. У ҳақиқатдан 2026-йил 14-январь куни “Абдухалил ота” чойхонасига ҳамкасблари билан бирга Ватан ҳимоячилари кунини нишонлаш учун боргани, уларнинг 3 нафари ўйин карталаридан фойдаланиб, “12” номли ўйин ўйнагани, 2 нафар шериги шунчаки томоша қилгани, ўша вақтда ўзини ИИБ ходими деб таништирган шахс келиб, уларнинг олдидаги пуллар, телефонлар ва ўйин карталарини олиб, Балиқчи тумани ИИБ биносига олиб боргани ва барчасига қимор ўйини ўйнагани юзасидан ҳужжат расмийлаштирилганини таъкидлаган.

Бундан ташқари, Т.Ў. аслида шериклари билан пул тикиб қимор ўйини ўйнамагани, фақат пулсиз карта ўйини ўйнаб ўтиришгани, 205 000 сўм пул эса овқат учун ўртада йиғилаётган маблағ бўлганини билдирган. Қолган ҳуқуқбузарлар ҳам айбига иқрор бўлмаган ва Т.Ў. берган кўрсатувни айтган.

Судда гувоҳ сифатида қатнашган Балиқчи тумани ИИБ ЖҚБ тезкор вакили А.Эрматовнинг айтишича, 14-январь куни унга Оққўрғон маҳалласидаги ушбу чойхонада қимор ўйини бўлаётгани ҳақида тезкор маълумот келиб тушган. У мазкур маълумотни тўғри ёки нотўғри эканини билиш учун чойхонага бир ўзи борган, айтилган хонага киришдан олдин ўша ерда юрган фуқаролардан бири ҳамда чойхона ишчисига қимор ўйини бўлаётганини тушунтириб, холис сифатида иштирок этиб беришларини сўраган. Улар рози бўлгач, учаласи қимор ўйналаётган хонага кирган ва барча жараён ИИБ ходимининг телефонига видеотасвирга олинган. А.Эрматов суддан ҳуқуқбузарларнинг ҳаммасига нисбатан қонуний чора кўришни сўраган.

Ушбу иш бўйича тўпланган далиллар ҳамда гувоҳлар берган кўрсатувлар асосида мазкур ҳуқуқбузарлик ўз тасдиғини топган.

Суд қарорига кўра, уларнинг барчаси Маъмурий жавобгарлик тўғрисидаги Кодекснинг 191-моддаси (Қимор ва таваккалчиликка асосланган бошқа ўйинлар) 1-қисмида назарда тутилган ҳуқуқбузарликни содир этган деб топилди. Ҳар бири 1 236 000 сўм (БҲМнинг 3 баравари) миқдорда жаримага тортилди.

Аввалроқ, Чортоқ туманидаги 8-мактаб директори хизмат хонасида шериклари билан қимор ўйнагани аниқлангани, кейинчалик, у билан тузилган меҳнат шартномаси бекор қилингани ҳақида хабар берилган эди.