Туркияда яна бир ўзбек аёли ўлдирилгани айтилмоқда
Туркиянинг ўрмон ҳудудидан 2 март куни аёл кишининг таниб бўлмайдиган ҳолатдаги жасади топилди. Унинг устидаги кийимларидан аёл Баликесир вилоятида 21 январь куни йўқолган 46 ёшли самарқандлик Дилафруз Чўлиева экани тахмин қилинмоқда.
Таъкидланишича, икки боланинг онаси бўлган Чўлиева Туркиянинг Баликесир вилоятининг Бурҳония туманида қонуний яшаган. Шунингдек, ишлашга ҳам рухсати бўлган. У 21 январь куни Эдремит туманидан Бурҳонияга қайтаётиб соат 20:00–20:30 атрофида автобусдан тушган. Шундан кейин у билан алоқа узилган. Аёл 22 январь куни ишга чиқмаган. 23 январь куни иш берувчилари уни қидириб, полицияга хабар берган.
Аёлнинг яқинлари 24 январь куни унинг йўқолганини билиб, Туркиядаги Ўзбекистон элчихонаси ва консулхонасига, шунингдек, ташқи ишлар ва ички ишлар вазирликларига мурожаат қилган.
Полиция тергови доирасида Илёс исмли шахс гумондор сифатида сўроқ қилинган. Маълум бўлишича, Чўлиеванинг телефонидан охирги сигнал ушбу шахснинг уйи атрофида қайд этилган. У ўз баёнотида Чўлиевани танишини, аммо у Истанбулга кетганини айтган.
Чўлиеванинг яқинлари 2 март куни топилган жасаднинг кийимлари ва баъзи аломатларга таяниб, жасад унга тегишли эканини таъкидлаган. Ҳозирча бу маълумот расман тасдиқланмади. Лекин ҳодиса юзасидан гумонланувчи сифатида ўзбекистонлик фуқаролар қўлга олингани хабар қилинди.
Сўнгги пайтларда Туркияда ўзбек аёллари билан боғлиқ бир неча фожиали ҳолатлар кузатилмоқда. Жумладан, Истанбулда ўзбекистонлик фуқаролар – Дурдона Ҳакимова ва Сайёра Эргашалиеванинг ўлими жамоатчиликда катта муҳокамаларга сабаб бўлган эди. Чўлиеванинг иши бўйича экспертиза ва ДНК натижалари кутилмоқда.
