Тезкор! Эронга янги олий раҳбар тайинланди!
Мамлакатнинг cобиқ олий раҳбари Али Хоминаийнинг ўғли — Мўжтаба Хоминаий янги олий раҳбар этиб сайланган. Бу ҳақда қатор ҳориж ОАВлари хабар тарқатмоқда.
Маълумотларга кўра, қарорни Эроннинг Олий раҳбарини сайлаш ваколатига эга бўлган Assembly of Experts қабул қилган. Айни пайтда ушбу қарор юзасидан расмий баёнот тўлиқ эълон қилинмаган.
Таҳлилчиларнинг таъкидлашича, Мўжтаба Хоминаий сўнгги йилларда мамлакат сиёсий доираларида фаол иштирок этиб келган ва консерватив кучлар орасида таъсирга эга шахс сифатида қаралади. Айрим манбалар эса ушбу тайинлов мамлакат ичида ва халқаро майдонда турли баҳс-мунозараларга сабаб бўлиши мумкинлигини билдирмоқда.
Маълумот учун, Эронда олий раҳбар мамлакатнинг энг юқори сиёсий ва диний мансабдори ҳисобланади ҳамда қуролли кучлар устидан олий назоратга эга.
Эслатиб ўтамиз, Али Хоминаий 28 февраль куни АҚШ ва Исроил томонидан амалга оширилган ҳаво зарбалари натижасида ҳалок бўлганди.
