Германия қурол экспорти бўйича Хитойни ортда қолдириб, дунёда тўртинчи ўринга чиқди
Стокгольм халқаро тинчлик тадқиқотлари институти (SIPRI) ҳисоботига кўра, Германия қурол экспорти бўйича Хитойни ортда қолдириб, дунёда тўртинчи йирик экспортёрга айланди. Бу ҳақда Stern нашри хабар берди.
Тадқиқотчилар маълумотига кўра, 2021–2025 йиллар оралиғида Германия қурол экспортининг қарийб тўртдан бир қисми Украинани қўллаб-қувватлашга йўналтирилган. Яна 17 фоизи Польша каби бошқа Европа давлатларига етказиб берилган.
Ҳисоботда таъкидланишича, экспорт ўсишининг асосий омиллари Украинадаги уруш ҳамда Европа давлатларининг Россияга қарши мудофаа қобилиятини кучайтириш истаги бўлган.
Тадқиқотчи Катарина Джокичнинг сўзларига кўра, Европа компаниялари қурол ишлаб чиқаришни оширган бўлса-да, Европа давлатлари 2021–2025 йилларда ҳам АҚШдан қурол, хусусан қирувчи самолётлар ва узоқ масофали ҳаво мудофаа тизимларини импорт қилишда давом этган.
Ҳисоботга кўра, ушбу даврда АҚШ жаҳон қурол экспортининг 42 фоизини таъминлаб, етакчи ўринни сақлаб қолган. Шунингдек, сўнгги йигирма йил ичида илк бор АҚШ қурол экспортининг асосий қисми Яқин Шарққа эмас, балки Европага тўғри келган.
Мутахассислар фикрича, 2022 йилда кенг кўламли урушга айланган Украина можароси Европа давлатларининг мудофаа сиёсатига жиддий таъсир кўрсатган. Натижада Европа мамлакатлари қурол ишлаб чиқариш ва харид қилиш ҳажмини кескин оширди ҳамда Киевга ҳарбий ёрдамни кучайтирди.
