Истанбулда жиноятчилар ўзбек энагани зўрлагани айтилмоқда
Туркиянинг Истанбул шаҳри, Қодикўй туманида мудҳиш жиноят юз берди. Озарбайжон фуқаролари бўлган икки шахс хонадонга бостириб кириб, нафақат талончилик, балки инсонийликка зид жиноятни содир этди.
Маълум бўлишича, Фузулий А. ва Турал А. исмли шахслар Қодикўйдаги хонадонлардан бирига ўғирлик мақсадида киришган. Улар уй эгаси — кекса аёлнинг тилла тақинчоқлари ва катта миқдордаги маблағини қўлга киритишган.
Жиноят давомида гумонланувчилардан бири — Фузулий А. хонадонда хизмат қилаётган ўзбекистонлик энагага нисбатан ваҳшийлик қилган. Жиноятчи аёлнинг қаршилигини синдириш учун унинг оғзини скотч билан боғлаб, куч ишлатиш орқали номусига теккан.
Жиноятни содир этгач, гумонланувчилар мамлакатни тарк этишга уринган. Туркия ҳуқуқ-тартибот идоралари томонидан ўтказилган тезкор қидирув тадбирлари натижасида, қочишга уринган шахслар аэропортда қўлга олинди.
