Машина муқаддас, пиёда одам эмас…
Бугунги кунда шаҳар ва маҳалла кўчаларида транспорт воситалари сони ортиши билан бирга, ҳайдовчилик маданияти ва инсонийлик омилларининг пасайиши жиддий муаммога айланмоқда. Ижтимоий тармоқларда кенг муҳокама қилинаётган «автотеррористлар» ибораси — бу шунчаки жаҳл устида айтилган сўз эмас, балки жамиятдаги оғриқли нуқтанинг ташхисидир. Уларни бир нарса бирлаштириб туради: ўз автомобилини муқаддас билиш ва йўлнинг бошқа иштирокчиларини, хусусан, пиёдаларни менсимаслик.
Бу каби «автотерроризм» нафақат қўполлик, балки атрофдагиларнинг ҳаётига таҳдид ҳамдир. Маҳалла ичи — бу пойга трассаси эмас, балки болалар, қариялар ва пиёдалар хавфсиз бўлиши керак бўлган ҳудуд. Қачонки темир матоҳ инсон қадридан баланд қўйилар экан, кўчаларимиздаги тартиб ва осойишталик ҳақида гапириш қийин. Жамият бундай «касаллик»дан қутулиши учун фақат жарималар эмас, балки ҳайдовчилик маданияти ва инсонийлик тарбияси биринчи ўринга чиқиши шарт.
