Хонзода Камбарова 7 ёшидан меҳнат қилганимишда! Ҳозир учта болали бўлиб, бойвачча блогер бўлиб кетибди!.. Ана энди эри билан ажрашмоқчи!..

Инстаблогер ва актриса Хонзода Қамбарова 12 март куни 27 ёшни қарши олди. Бугун у бир нечта бизнеслар эгаси ва уч нафар қизалоқнинг онаси сифатида танилган. “Фитна” ва “Саодат” сериалларидаги роллари орқали томошабинларга танилган Хонзода болалиги осон кечмаганини айтади. У санъатдан йироқ оилада вояга етган ва оиладаги моддий қийинчиликлар сабаб жуда эрта меҳнат қилишга мажбур бўлган. Актриса 7 ёшидан бошлаб сут ва қатиқ сотиб пул топганини, кейинчалик ширинлик, совун ва кийим-кечак савдоси билан ҳам шуғулланганини эслайди.

Хонзоданинг санъат соҳасига кириб келиши осон кечмаган. Отаси бу касбни танлашига қарши бўлганига қарамай, онасининг қўллаб-қувватлаши билан Тошкент маданият коллежига ўқишга кирган. Аввалига драма актёрлиги бўлимига қабул қилинган бўлса-да, оилавий шароит туфайли кейинчалик анъанавий хонандалик бўлимида ўқишга мажбур бўлган. Коллежда ўқиётган вақтларида тўйларда бек-вокал хонанда сифатида иштирок этиб, пул топишни бошлаган. Шу орқали оиласига ёрдам берган ва 18 ёшида илк автомобили — Spark машинасини сотиб олган.

Унинг санъатдаги фаолияти 2014 йилда “Мен ёлғончиман” фильмидаги иштироки билан бошланган. Кейинчалик “Саодат” сериалида суратга тушиб, кенгроқ танилган. Шу билан бирга “Браво” кулги жамоаси концерт дастурларида иштирок этган. Бироқ турмушга чиққанидан кейин келинлик уйидаги айрим чекловлар сабаб кино ва сериалларда фаол қатнашиш имкони камайган. Шундан сўнг у ижодини асосан интернетда давом эттириб, вайнерлик ва блогерлик билан шуғуллана бошлаган.

Бугунги кунда Хонзода Қамбарова Instagram орқали реклама ва блогерликдан даромад топади. Шунингдек, гўзаллик салони ва келин кўйлаклари ижараси каби бизнеслари ҳам бор. У 23 ёшида Captiva автомобилини харид қилганини ҳам айтиб ўтган. Шу билан бирга актриса айни пайтда катта қарзлари борлигини ва топган даромадининг катта қисми шу қарзларни тўлашга кетишини ҳам яширмаган.

2025 йил ёзида Хонзода турмуш ўртоғи билан ажрашаётганини маълум қилган эди. У бу қарор пиар эмаслигини, оилавий келишмовчиликлар узоқ вақт давом этганини айтган. Ажрим жараёнлари декабрь ойида якунланиши кутилмоқда. Блогернинг таъкидлашича, улар фарзандлари учун отаси билан муносабатларни сақлаб қолишга ҳаракат қилади.