Эрон: «Харк ороли босқинчилар учун қабристонга айланади!»
Эронга ҳужум қилинган тақдирда, душманлар Ормуз бўғозидагидан кўра қаттиқроқ шарманда қилинади. Бу ҳақда Эрон мажлисининг энергетика қўмитаси матбуот котиби Эсмоил Хосайний баёнот берди.
«Агар душманлар оролга тажовуз қилишни режалаштираётган бўлса, шуни билсинларки… у босқинчилар учун қабристонга айланади», — дея унинг сўзларидан иқтибос келтирмоқда «Tasnim» агентлиги.
Аввалроқ Эрон Қуролли Кучлари Бош штаби расмий вакили Аболфазл Шекарчи ҳам огоҳлантириш билан чиққан эди: агар АҚШ Харк оролига зарба берса, Яқин Шарқдаги барча нефть-газ объектлари «кул тепасига» айланади.
Вазиятнинг кескинлашуви
Axios нашри маълумотларига кўра, Вашингтон Теҳронни «иқтисодий нокаут»га учратиш учун ушбу ҳудудни эгаллаб олиш имкониятини кўриб чиқмоқда. Харк оролида Ислом Республикасининг энг йирик нефть терминали жойлашган бўлиб, мамлакат экспортининг 90 фоизи айнан шу ерда қайта ишланади.
