Трамп: «Эронни бир ёқли қилганимдан сўнг, Кубани «шохи»ни синдираман!..» (видео)

АҚШ Президенти Дональд Трамп Куба ҳукуматига нисбатан босимни кучайтирмоқда ва мамлакатнинг амалдаги раҳбариятини алмаштириш масаласини кўриб чиқмоқда. Бу ҳақда The New York Times нашри ўз манбаларига таяниб хабар берди.

Маълум қилинишича, Вашингтон Куба Президенти Мигель Диас-Канелни ҳокимиятдан четлатиш имкониятларини муҳокама қилмоқда. Шу билан бирга, АҚШ Кубанинг сиёсий тизимини тўлиқ ўзгартириш ниятида эмаслиги қайд этилган.

Трамп журналистлар билан мулоқот чоғида Кубага нисбатан режалари ҳақида кескин баёнотлар берди:

“Мен Кубани эгаллаб олишни хоҳлайман. Уни озод қилиш ёки назоратга олиш — нима қилишни истасам, шуни қиламан”, — деди Трамп.

Нашр маълумотларига кўра, АҚШ томонидан жорий этилган босим чоралари ортидан оролдаги вазият оғирлашиб, электр таъминотида жиддий узилишлар кузатилган.

Айни пайтда Вашингтон ва Гавана ўртасида музокаралар олиб борилмоқда. Куба томони можарони дипломатик йўл билан ҳал қилишга умид қилмоқда, бироқ ҳозирча аниқ натижаларга эришилмаган.

Трамп ҳозирда асосий эътиборни Яқин Шарқдаги вазиятга қаратаётганини, Эрон билан боғлиқ ҳарбий операция якунланганидан сўнг АҚШ ташқи сиёсатида Куба масаласига алоҳида урғу берилиши мумкинлигини билдирди. Шунингдек, АҚШ Президенти яқин вақт ичида Кубада ҳокимият алмашиши эҳтимоли юқори эканини ҳам таъкидлаб ўтган.