Хитой Тайванни тўла ўраб олди!.. Навбатдаги уруш ўчоғини фақатгина вақт тўсиб турибди!..

Бу воқеа атиги бир неча кун ичида содир бўлди. Қарийб икки ҳафталик танаффусдан сўнг, осмонда ва денгизда яна ўнлаб ҳарбий техникалар пайдо бўлди. Фақат охирги сутканинг ўзида камида 26 та самолёт ва 7 та кема қайд этилди. Уларнинг бир қисми илгари дахл қилинмайдиган шартли чегарани кесиб ўтган.

Тайвань томони буни «уруш эълон қилмасдан босим ўтказиш тактикаси» деб атамоқда. Бунда орол аста-секин ҳар томондан қуршаб олинади ва унинг реакция тезлиги ҳамда реал сценарийларга қай даражада тайёрлиги синовдан ўтказилади.

Ҳарбийларнинг қайд этишича, Хитой кучлари бир вақтнинг ўзида бир неча йўналишдан — шимол, марказ ва жанубдан кириб келиб, ҳудуд устидан тўлиқ назорат ўрнатиш ҳиссини уйғотмоқда. Бу воқеалар фонида экспертлар тобора кўпроқ «қамал репетицияси» ҳақида гапиришмоқда.

Бу тўғридан-тўғри зарба эмас, балки ундан кўра хавфлироқ сценарийдир: таъминот йўлларини ёпиб қўйиш, денгиз ва ҳаводан босим ўтказиш ҳамда расман уруш бошламасдан туриб, оролни аста-секин «бўғиб қўйиш». Бундай ҳаракатлар вазият кескинлашган тақдирда Хитойнинг реал стратегияси сифатида очиқдан-очиқ кўриб чиқилмоқда.

Вазиятни янада таранглаштираётган жиҳат шундаки, бу фаоллик ғалати танаффусдан сўнг бошланди. Қарийб икки ҳафта давомида Хитой авиацияси деярли кўринмаган эди, сўнгра тўсатдан кескин фаоллашув юз берди. Таҳлилчиларнинг фикрича, бу тасодиф эмас, балки мураккаб ўйиннинг бир қисми бўлиши мумкин: аввал кучланишни пасайтириб, сўнгра ҳаммани ғафлатда қолдириш учун босимни кескин кучайтириш.