Дунё, дунёлигини йўқотишга тайёр турибди!..
Financial Times хабарига кўра, яқин 10 кун ичида дунё жиддий газ инқирозига дуч келиши мумкин. Бунга Форс кўрфазидан етказиб бериш занжирининг тўхтаб қолиши сабаб бўлмоқда.
Маълум қилинишича, дунёдаги суюлтирилган табиий газнинг катта қисмини ишлаб чиқарадиган Қатар экспортни тўхтатган. Бу қарорга Эрон томонидан Ҳормуз бўғозининг ёпилиши сабаб бўлган.
Таҳлилчиларнинг таъкидлашича, ҳозирда йўлда бўлган сўнгги танкерлар манзилига етиб боргач, тахминан 10 кун ичида глобал танқислик сезила бошлайди.
Бу ҳолат, айниқса, энергия импортига боғлиқ давлатлар учун жиддий синов бўлиши кутилмоқда. Улар юқори нархларда газ сотиб олиш, муқобил ёқилғи манбаларига ўтиш ёки аҳоли ва бизнес учун истеъмолни чеклаш чораларини кўришга мажбур бўлади.
Нефть ва газга юқори даражада қарам бўлган Осиё мамлакатлари эса аллақачон эҳтиёт чораларини кучайтирган. Айрим ҳудудларда танқисликни юмшатиш мақсадида ҳатто тўрт кунлик иш ҳафтаси жорий этилган.
