Сиёсий ўйинлар армиянинг Эронга қарши операцияси натижаларига соя солмоқда
АҚШ Мудофаа вазири Пит Хегсет Америка матбуот корпусига нисбатан кескин айбловлар билан чиқиш қилди. Пентагон раҳбари ОАВ вакилларини сиёсий қарашлар туфайли АҚШ қуролли кучларининг Эронга берган зарбалари самарадорлигини атайлаб пастга уришда ва жамоатчилик фикрини манипуляция қилишда айблади. Пит Хегсетнинг таъкидлашича, Америка ОАВлари Президент Дональд Трамп маъмуриятига бўлган нафрати туфайли ҳарбий операцияларнинг натижаларини бузиб кўрсатмоқда.
«Сиз Трампнинг муваффақият қозонишини шу қадар истамаяпсизки, ҳатто армиямизнинг самарали зарбаларига қарши чиқишга мажбур бўлмоқдасиз. Сиз ҳақиқатни эмас, балки ярим ҳақиқат ва сиздирилган маълумотларни айлантириб, жасур учувчиларимизнинг зафарини шубҳа остига қўйиш билан бандсиз», — деди Пентагон раҳбари.
Вазир ўз нутқида B-2 ва F-35 учувчилари, шунингдек, ёнилғи қуйиш экипажлари ва ҳаво ҳужумидан мудофаа бўлинмаларининг машаққатли меҳнати матбуот томонидан эътиборсиз қолдирилаётганини алоҳида қайд этди. Унинг фикрича, 36 соатлаб давом этадиган мураккаб парвозлар ва ҳарбий топшириқларнинг техник томонларини ёритиш ўрнига, ОАВ «миссия муваффақиятсиз бўлган» деган ёлғонни тарқатмоқда.
