Ўзбекистон МТЖ мураббийи ўз ватанидан кўра омадлироқ! Нега биласизми?
Европа қитъасида Жаҳон чемпионати йўлланмаси учун ҳал қилувчи плей-офф босқичининг финал учрашувлари бўлиб ўтади. Италия бир киши кам қолган ҳолда Босния билан асосий ва қўшимча бўлимларда дуранг ўйнади. Ғолиб пеналтилар сериясида аниқланди. Унда омад боснияликларга кулиб боқди. Италия эса қаторасига учинчи бор мундиалсиз қолди.
Босния — Италия 1:1 (пеналтилар серияси: 4:1)
Бунга ишониш қийин, аммо ҳақиқат шу: 2006 йилги жаҳон чемпиони Италия нақ 20 йилдан бери Жаҳон чемпионатининг плей-офф босқичини кўрмаяпти. Аввал икки марта гуруҳда қолиб кетган «Скуадра Адзурра», мана энди кетма-кет учинчи бор мундиал чиптасидан маҳрум бўлди.
Бир пайтлар дунё гигантларини титратган Италия учун бугун Парагвай, Словакия, Коста-Рика, Швеция, Шимолий Македония ва эндиликда Босния каби терма жамоалар енгиб бўлмас «қоя»га айланиб қолди. Грандилик мақоми аллақачон тарихда қолгандек.
Бугунги Италия таркибида ҳақиқий юлдуз мақомига лойиқ ягона футболчи — Жанлуижи Доннарумма эди.
Аслида, асосий ва ишонган ҳужумчиси Мойзе Кин бўлган терма жамоанинг Жаҳон чемпионатига чиқа олмаганини катта сенсация деб бўлмайди. Бугунги Италияда «гол машинаси» ёки ўйин тақдирини ҳал қилувчи ҳақиқий «тўққизлик» етишмаётгани аччиқ ҳақиқатдир.
Начора, Италиядан мундиалга бу сафар Ўзбекистон МТЖ мураббийи Фабио Каннаваро борадиган кўринади.
