Зудлик билан жамғарма тузайлик! «Отарчи» жамғармасини!..

Бошқа илож йўқ, чунки «отарчилар» топганларидан солиқ тўлайдиган бўлиб туришибди. Агар улар кунига топадиган беш-олти минг долларидан солиқ тўлашса, тирикчиликлари нима бўлади? Уларни эски кийимда одамлар кўришса, нима деган хаёлга боришади… Ахир куни кеча энг қиммат «Мерс»дан тушиб келган ва кошона уйларига кўкракларини кериб борган отарчи бугун мунғайиб қолса, уят-ку. Шундай экан, эй оддий одамлар ва ўқитувчилар, келинглар бошимизни қовуштирайлик! Ҳаммамиз оладиган маошларимизнинг ҳар ой ўн беш-йигирма фоизини азиз ва мўътабар отарчиларимизга бериб турайлик. Ана шунда отарчиларимиз яна кўкрак кериб юришади, бизга ўзларининг паст назарлари билан қарашади. Ана шунда ҳеч нима ўзгармайди ва биз ҳам кўникмамизни йўқотмаймиз.

Олдинига жамғарма тузамиз, сўнг пулларимизни шу жамғармага йўналтирамиз. Ана ундан кейин отарчиларнинг тўй дафтарларини кўриб чиқамиз. Кимнинг тўйи — уларнинг ўз гаплари билан айтганда — «хизматлари», «халқ хизматлари» кўп бўлса, ўшанга кўпроқ пул берамиз. Чунки унинг солиғи бошқаларникидан кўп бўлади-да!