LEGO’дан катта шов-шув: Роналду, Месси, Мбаппе ва Винисиус бир рекламада жам бўлди (видео)
Кўпчилик бу видеони сунъий интеллект маҳсули деб ўйлаши мумкин. Аммо ролик ҳақиқий — футбол юлдузлари уни ўзларининг расмий Instagram саҳифаларида ҳам улашди.
LEGO компанияси 2026-йилги Жаҳон чемпионати олдидан йирик лойиҳа ишга туширди. Унга кўра, машҳур футболчиларнинг миллий терма жамоа либосидаги махсус конструктор тўпламлари тақдим этилади.
Реклама ролигида тўрт нафар юлдуз битта стол атрофида йиғилиб, LEGO’дан Жаҳон чемпионати кубогини ясашга киришади. Ҳар бири кубок тепасига ўз ҳайкалчасини қўйишга уринади — яъни ғалабага даъво қилади. Бироқ улар бир-бирига халақит бериб, бунга эриша олмайди. Охир-оқибат эса кичик бола келиб, нейтрал ҳайкалчани жойлаштиради.
«LEGO Editions» коллекцияси 1-майдан сотувга чиқиши кутилмоқда.
Қизиқарли жиҳат: Instagram’да LEGO билан бирга Роналду, Мбаппе, Винисиус ҳамда FIFA’нинг Жаҳон чемпионати саҳифаси ҳамкорлик қилган. Месси эса бу коллаборацияда иштирок этмаган ва видеони алоҳида жойлаштирган. Шунга қарамай, унинг видеоси бошқаларникига қараганда кўпроқ томоша ва лайк тўплаган.
