Жинсий зўравонлик ва одам савдосида тергов қилинаётган кикбоксчи Тошкентда зарбоп тўн кийгизилиб кутиб олинди
Собиқ профессионал кикбоксчи ва бир қанча давлатларда жиноий ишлар бўйича тергов қилинаётган Эндрю Тейт Тошкентга келди ва тантанали кутиб олинди. Бу ҳақда у X ижтимоий тармоғида видеолар жойлади. Видеода унинг укаси Тристан Тейт ҳам кўринади.
Аввалроқ, журналистлар Эндрю ва Тристан Тейт казино компанияси билан фойда тақсимлаш бўйича келишувда қатнашганини аниқлаган. Мазкур компания эгалари ҳозир оғир жиноят — уюшган жиноий гуруҳ тузиш иши бўйича тергов остида.
АҚШнинг Флорида штати бош прокурори ака-ука Тейтларга нисбатан жиноий тергов бошлаган. Улар Руминияда одам савдоси билан шуғулланганликда айбланмоқда.
Эндрю Тейт Руминияда тергов остида бўлган пайтда Тинч океани жанубидаги давлатлардан биридан “олтин паспорт” олган. Ҳозир у Буюк Британияда ҳам айбловларга дуч келмоқда, аммо у барча айбловларни рад этган.
2024 йил августда у Руминияда уй қамоғига олинган. Прокуратура унга, унинг укаси Тристанга ва яна тўрт кишига нисбатан иккинчи жиноий иш очган. Уларнинг барчаси айбларни инкор қилган.
Шунингдек, улар Буюк Британияда ҳам қидирувда бўлиб, жинсий зўравонликда айбланмоқда.
Бундан ташқари, ака-ука солиқ тўлашдан бўйин товлаганликда ҳам айбланмоқда. 2024 йил декабрда Британия суди уларнинг 21 миллион фунт даромадидан солиқ тўланмагани сабаб 2 миллион фунтдан ортиқ маблағни мусодара қилишга рухсат берган. Тейт бу қарорни “адолатсиз” деб атаган.
Маълумот учун, Тейт 1986 йил декабрда туғилган. Отаси АҚШ ҳарбий-ҳаво кучларида хизмат қилган ва шахмат устаси бўлган. Ота-онаси ажрашгач, у онаси билан Англиянинг Лутон шаҳрига кўчиб ўтган.
Тейт ва унинг укаси болалигида қашшоқликда яшаганини айтган.
У кикбоксинг бўйича 4 карра жаҳон чемпиони бўлган, аммо асосий машҳурликка интернет орқали эришган.
