iPhone 18 Pro янги ранглар билан кутилмоқда
Apple компанияси iPhone 18 Pro туркумидаги смартфонлар учун классик қора рангдан воз кечади. Бу ҳақда инсайдер “Instant Digital” маълумотига таяниб, “MacRumors” хабар берди.
Маълумотларга кўра, Apple премиум моделлари учун қора рангни олиб ташлаб, янги ва қизиқарли ранглар синовдан ўтказилмоқда. Илгари iPhone 17 Pro ва iPhone 17 Pro Max флагманлари ҳам қора ёки тўқ кулранг вариантларсиз чиқарилганди. Ҳозирда улар фақат кумушранг (Silver), тўқ сариқ (Cosmic Orange) ва тўқ кўк (Deep Blue) рангларда мавжуд.
“Bloomberg” журналисти Марк Гурманнинг хабар беришича, iPhone 18 Pro учун тўқ қизил корпус варианти ҳам синовдан ўтказилмоқда. Илгари инсайдерлар бинафша ва жигарранг версиялар ҳақида гапирган, аммо Гурман фикрига кўра, бу барчаси қизил концепциянинг турли кўринишлари.
Шу билан бирга, компания ўзининг бўлажак буклама iPhone моделида консерватив рангларга эътибор қаратади. Space Gray ёки классик қора, шунингдек, кумуш ёки оқ ранглар афзалликда бўлиши мумкин.
iPhone 18 Pro линиясининг расмий тақдимоти сентябр ойида кутилмоқда, буклама смартфон эса шу йилнинг кейинроқ муддатларида бозорга чиқиши эҳтимол қилинмоқда.
