Ўғирликни раис бошлаб берарди!..
Вой, нималар деяпман? Нега раис ўғирлик қиларкан? Ҳечам ўғирлик эмас. Бу — қонун! У — раис. Шундай экан, ҳар ҳафтада бир тележка беда унинг уйига бориши керак. Ундан, албатта, агроном ўрнак олади. Унинг уйига ҳам ҳафтада бир тележка беда. Кейин инженер, бош бухгалтер, зоотехник, бўлим агрономи ва ҳоказо ва ҳоказо… Охири бригада бошлиғи ва ундан кейин қоровул олади бир тележкадан…
Уларнинг олганлари ўғирлик эмас. Улар шу лавозимларда ўтирибдими, демак, олишлари керак. Бу ёзилмаган бўлса ҳам — қонун. Ўғирликни эса анави «қора халқ» қилади. «Қора халқ» ўроғини олиб, эшагини миниб кечаси йўлга тушади. Бир фартукдан беда ўриб уйига олиб келади. Ана шулар текшир-текширга тушади, ана шулар жаримага тортилади. Албатта, мабодо керак бўлиб қолса…
Бу анча ўтган замонда содир бўлар эди. Буни нега энди гапиряпман? Билмасам. Эҳтимол, ёв қочганидан кейин, ёв умуман кўринмай кетганидан кейин қаҳрамонлигим тутиб қолган бўлса керак… Ҳа, колхоз (жамоа хўжалиги) даврида шундай бўлган…
