Ҳавога соврилган 450 миллион фунт!..
«Ливерпуль»нинг собиқ ҳимоячиси Жейми Каррагер жамоасининг Чемпионлар лигаси чорак финали дастлабки учрашувида ПСЖдан учраган мағлубиятини (0:2) кескин танқид қилди.
«Худди қуйи дивизион жамоасининг ўйинини томоша қилгандек бўлдим. Маълум маънода, бу ҳали яхши натижа, чунки «Ливерпуль» ўз дарвозасидан 5-6 та гол олиб чиқиши мумкин эди. Ўтган мавсумни ҳисобга олсак, икки жамоа ўртасидаги фарқ ҳайратланарли даражада катта. Ўшанда «Энфилд»даги жавоб ўйини ҳақиқий кучлилар тўқнашуви бўлган ва жуда кескин ўтганди.
Шундан сўнг «Ливерпуль» трансферлар учун 450 миллион фунт сарфлади — бу эҳтимол ПСЖнинг мавсумлараро харажатларидан анча кўпроқдир. Ва шунча сарф-харажатдан кейин бундай катта фарқни кўриш кишини хавотирга солади. Одамнинг хаёлидан: «Бу ҳолга қандай келиб қолдик? Қандай қилиб ҳаммаси бунчалик ёмонлашиб кетди?» деган фикрлар ўтади», — дея куюниб гапирди Каррагер Sky Sports эфирида.
Эслатиб ўтамиз, ўтган мавсумда ҳам «Ливерпуль» айнан ПСЖ билан бўлган қарама-қаршиликдан сўнг Чемпионлар лигасини тарк этган эди.
