Хитойча романтика: Куёв келинни канализация чиқиндиларини ташувчи техникалардан иборат кортежда олиб кетди (Бахт оддийликда).
Хитойлик 30 ёшли Пань Хаонань ўз тўйига ҳашаматли лимузинлар ўрнига 9 та ассенизатор машинасидан (канализация чиқиндиларини ташувчи техникалар) иборат кортежда келди.
Пань аслида видеомонтаж йўналишида ўқиган бўлса-да, кейинчалик отасининг 20 йиллик бизнесини давом эттиришга қарор қилган. У ҳозирда канализация тозалаш бригадасига раҳбарлик қилади. Энг қизиғи, келин — Ли Яцин бу ғояни нафақат маъқуллаган, балки уни романтик ва оригинал деб атаган. Ота-оналар бошида қарши бўлишса-да, келиннинг розилигидан сўнг фикрларидан қайтишган. Тўй учун танланган барча 9 та машина синчковлик билан ювилиб, дезинфекция қилинган. Улар байрамона қизил гуллар ва ленталар билан безатилган. Ҳатто машиналардан бирига ҳазилона қилиб: «Ахлат қироли Хаонанга бахтли никоҳ тилаймиз!» деб ёзилган баннер осиб қўйилган.
Пань Хаонаннинг ўз касбига бўлган муносабати кўпчиликда ҳурмат уйғотди:
«Биз энг ифлос ва бадбўй ишни бажарсак ҳам, топаётган пулимиз ҳалол ва тоза. Бизнинг соҳа жуда барқарор: модмики одамлар овқат ер экан ва ҳожатхонага борар экан — биз доим керак бўламиз».
Ушбу воқеа ҳар қандай касб эгаси ўз меҳнати билан фахрланиши кераклигини кўрсатувчи гўзал намунага айланди.
