Трамп Ҳормуз бўғозини блокада қилиш бошланишини эълон қилди
АҚШ президенти Дональд Трамп мамлакат Ҳарбий-денгиз кучлари ва иттифоқчилари Ҳормуз бўғозини блокада қилишни бошлашини маълум қилди.
У Truth Socialда ёзишича, АҚШ денгиз кучлари бўғозга кириш ёки ундан чиқишга уринаётган барча кемаларни назорат остига олади.
Трампнинг таъкидлашича, блокада яқин вақт ичида бошланади ва унда бошқа давлатлар ҳам иштирок этади.
Шунингдек, у АҚШ ҳарбий-денгиз кучларига Эронга бўғоздан ўтиш учун тўлов қилган кемаларни халқаро сувларда излаш ва ушлаб қолиш бўйича топшириқ берилганини айтди.
«Ноқонуний тўлов тўлаган ҳеч бир кема очиқ денгизда хавфсиз ҳаракат қила олмайди», — деди Трамп.
Бу баёнот минтақадаги кескинлик янада кучайиши мумкинлиги ҳақидаги хавотирларни оширмоқда.
