Абдуқодир Ҳусановни «эплаб» бўлмаяпти!

“Манчестер Сити” ва Ўзбекистон терма жамоаси ҳимоячиси Абдуқодир Ҳусанов Англия Премьер Лигаси 32-туридан ўрин олган “Челси”га қарши учрашувда (0:3) асосий таркибда майдонга тушиб, тўлиқ ҳаракат қилди.

Баҳс давомида Ҳусанов 79 марта тўп билан муомала қилди. Ҳимоячи жами 73 та узатма амалга оширди, уларнинг 68 таси аниқ манзилга етиб борди — 93 фоиз аниқлик. У икки марта “калит узатма” берди (рақиблар орасидан жамоадошига пас бериш), шунингдек, бир марта узоқ масофадан дарвозага кучли зарба йўллади. Sofascore портали ўзбекистонлик футболчининг ҳаракатларини 7,6 балл билан баҳолади.

Абдуқодир Ҳусановнинг ҳимоядаги ҳаракатлари:
Ҳимоявий ҳаракатлар — 4 марта;
Рақиб ҳужумини қайтариб қолиш — 1 марта;
Тўпни қайтариб олиш — 3 марта;
Тозалаш — 1 марта;
Рақиб зарбасига блок қўйиш — 2 марта;

“Манчестер Сити”нинг иккинчи голига муаллифлик қилган ва Ҳусанов билан ҳимояда бехато ҳаракат қилган Марк Геҳи ўйиннинг энг яхши футболчиси деб топилди — 9,2 балл. Ўйинда ҳисобни очган Нико О’Райлининг ҳаракатлари — 8 балл, иккита голли узатмани амалга оширган Райан Шерки ҳамда учинчи гол муаллифи Жереми Докунинг кўрсатган ўйини 7,9 баллга лойиқ кўрилган. “Қуруқ ўйин” ўтказган дарвозабон Жанлуижи Доннарумма ҳам 7,9 балл олган.
“Манчестер Сити” турнир жадвалида 64 очко билан иккинчи поғонани эгаллаб турибди. Пеп Гвардиола бошқарувидаги жамоа пешқадам “Арсенал”дан олти очкога ортда қолмоқда. Бироқ, “шаҳарликлар” ҳисобида битта қўшимча ўйин мавжуд. “Челси” эса 48 очко билан 6-ўринда бормоқда.
“Шаҳарликлар” навбатдаги учрашувини 19 апрель куни АПЛ 33-тури доирасида “Арсенал”га қарши ўтказади.