«Эй-й, Трамп! «Дональд Дак» нусха! “Отиш керак бўлса отда, вақилламай!”
Исроил Миллий хавфсизлик қўмитаси раиси, ўта ўнгчи депутат Цвика Фогель АҚШнинг сайланган президенти Дональд Трампга нисбатан ижтимоий тармоқларда бошлаган “ҳужуми” учун қаттиқ танбеҳ эшитди. Ҳаммаси оддий бир твитдан бошланган эди, аммо оқибати халқаро можаро даражасига етди.
“Отиш керак бўлса от, вақиллама!”
Фогель ўз саҳифасида Трампни мазах қилиб, уни машҳур мультфильм қаҳрамони “Дональд Дак” (ўрдак) га қиёслади. Ўт очишни тўхтатиш ҳақидаги келишувдан норози бўлган депутат инглиз тилида шундай ёзди: “Дональд, агар отиш керак бўлса — от, вақиллаб (кря-кря қилиб) ўтирма”. Гапига исбот сифатида ўрдакча смайлигини ҳам қўшиб қўйди.
Бу пост Америка сегментида яшин тезлигида тарқалиб, ярим миллиондан ортиқ кўришлар сонини йиғди. Бироқ, тез орада “вақиллаган” Трамп эмас, балки Фогелнинг ўзи эканлиги маълум бўлди.
Ҳукуматдаги ваҳима ва мажбурий узр
Пост эълон қилингач, Исроил расмийлари зудлик билан уни ўчиришни талаб қилишди. Ҳатто Фогелнинг партиядоши, “Оцма Йеҳудит” етакчиси Итамар Бен-Гвир ҳам вазирлар маҳкамаси йиғилишидан чиқибоқ, депутатдан тушунтириш ва твитни йўқотишни талаб қилган.
Босимлар остида қолган Фогель чекинишга мажбур бўлди. У янги баёнотида шундай деди:
“Жаноб президент, сиз АҚШ манфаатини ўйлаганингиз каби, мен ҳам Исроил давлати манфаатини ўйлайман. Танқидимдан мақсад — овозим эшитилиши эди ва у мақсадига етди. Аммо сизни камситиш ниятим йўқ эди”.
Кейинчалик берган интервьюсида эса у янада эҳтиёткорлик билан: “Трамп хафа бўлганини тушунтиришганидан сўнг твитни ўчирдим. Ёзган гапларимдан афсусда эмасман, фақат унинг кўнглига тегганидан афсусдаман”, — деб қўшиб қўйди.
Нетаньяхудан қаттиқ огоҳлантириш
Бош вазир Биньямин Нетаньяху коалиция аъзоларининг бундай “ўзбошимчалигини” кескин қоралади. У депутатларни тилига эҳтиёт бўлишга чақириб, Исроил ҳозир АҚШ билан тарихий чорраҳада турганини таъкидлади. “Қачон гапириш ва қачон сукут сақлашни мен белгилайман. Оғиз очишдан олдин маслаҳатлашишни ўрганинглар”, — дея пўписа қилди Бош вазир.
Якунда Фогель яна бир “реверанс” қилиб, айбни Трампнинг атрофидагиларга ағдарди: “Агар Трамп ўз генералларига эмас, Нетаньяхуга қулоқ солганида, биз барча фронтларда катта муваффақиятга эришган бўлардик”.
Ҳозирда “ўрдакчалар” ҳақидаги ҳақоратли постлар ўчириб ташланган, аммо бу воқеа Исроил ва АҚШ ўртасидаги муносабатлар нақадар нозик эканлигини яна бир бор кўрсатди.
