Қуролли ҳужум оқибатида ганалик 20 ёшли футболчи ҳалок бўлди
Гана чемпионатининг “Берекум Челси” клуби ҳужумчиси Доминик Фримпонг жамоа автобусига уюштирилган қуролли ҳужум оқибатида вафот этди. Бу ҳақда Гана футбол ассоциацияси матбуот хизмати хабар берган. Маълум қилинишича, жамоага ҳужум “Самартекс” клубига қарши меҳмонда бўлиб ўтган мамлакат чемпионати ўйинидан (0:1) сўнг, ортга қайтаётган вақтда содир бўлган.
“Ассоциация ‘Берекум Челси’ футбол клуби аъзоси Доминик Фримпонгнинг вафоти ҳақидаги фожиали хабарни чуқур қайғу билан қабул қилди. Ушбу фожиали воқеа нафақат клуб, балки бутун Гана футболи учун улкан йўқотишдир. Доминик ўзининг ўйинга бўлган иштиёқи ва садоқати билан лигамиз руҳини ўзида мужассам этган истиқболли ёш истеъдод эди”, дейилади баёнотда.
Аввалроқ шунга ўхшаш ҳолат 2023-йилда ҳам содир бўлган, ўшанда “Легон Ситис” жамоаси автобуси “Самартекс”га қарши ўйиндан кейин ҳужумга учраган, бироқ ҳеч ким жароҳат олмаган.
Маълумот учун, Фримпонг 20 ёшда эди, у жорий мавсумда клуб сафида 13 та ўйинда майдонга тушиб, 2 та гол уришга муваффақ бўлган.
