МУСОФИРНИНГ ҚОНИГА ҚУРИЛГАН ҚАСРЛАР
Бугунги гапларим кимгадир маломат, кимгадир дакки бўлиб тегар, аммо бу ҳақиқатнинг аччиқ таъмидир. Фарзандларини чет элга юбориб, уларнинг тирноқлари орасидан чиқаётган қонли меҳнатлари эвазига келаётган маблағни фақат тўй, латта-путта ва темир-терсакка (автомобилларга) сарфлаётган ҳамюртларим, эшитинг!
Невараларингиз қисматини ким ҳал қилади? Сиз бугун ўғлингиз юборган пулни дабдабали тўйларга сочиб, «одамлар нима дейди?» деган ваҳима билан яшаётган бўлсангиз, билингки: сиз неварангизнинг келажагини бугун ўша тўйхонада совуряпсиз! Агар бу маблағларни ўқишга, ишлаб чиқаришга ёки кичик бўлса-да хизмат кўрсатиш соҳасига йўналтирмасангиз, невараларингиз ҳам келажакда чет элнинг кўчаларида сарсон бўлишга маҳкум!
Ҳижронга маҳкум қилинган оилалар Охирги 25-30 йил ичида ўзбекнинг минглаб ёш келин-куёвлари бир-бирининг висолига тўймай, энг гўзал йилларини ҳижрон ўтида куйдириб ўтказяпти. Фарзандлар ота дийдорига тўймай, суратларга қараб улғаймоқда. Бу ниманинг эвазига? Сизнинг бир кунлик «орзу-ҳавас»ингиз ва қўшнидан кам бўлмаслик учун қилган сохта ғурурингиз эвазигами?!
«Уй беги» оталар эпидемияси Энг даҳшати — ўғли чет элга бориб, бироз пул юборишни бошлаши билан ишини ташлаб, «уй беги»га айланиб қолган оталардир. Кучини бировнинг ишига эмас, ўз юртида тадбиркорликка ёки фарзанди қайтганда ишлайдиган иш ўрни яратишга сарфлаш ўрнига, тайёр пулнинг соясида дам олишни одат қилишди. Бас қилинглар!
Хулоса ўрнида: Умр бир марта берилади. Вақт машинаси йўқ! Агар бугун ақлни ишлатмасак, фарзандларимизнинг умрини сарсонликда, ўзимизнинг умримизни эса сохта ялтироқликлар ичида бой берамиз.
Ҳозир бу гапларимдан кейин «ясанишни яхши кўрадиган аёллар» ва «уй беги» бўлган жаноблар кавлашишни бошлашади. Аммо ҳақиқат шу: Биз келажакни совуряпмиз!
