ДАҲШАТЛИ ФАРҚ: Илгари ўқитувчидан калтак еган бола уйига қўрқиб борарди, ҳозир эса болани сўккан ўқитувчи уйига қўрқиб кетяпти! Жамият қаёққа қараб кетмоқда?

Бугунги ўзбек мактабларида тизим эмас, одамларнинг дунёқараши шундай тезликда ўзгардики, натижада таълим ва тарбия ўртасидаги мувозанат бутунлай барбод бўлди. Ижтимоий тармоқларда кенг муҳокама қилинаётган ушбу аччиқ ҳақиқат ҳар бир ота-онани ва мутасаддини чуқур ўйлантириши шарт!

Кеча: Ўқитувчи — иккинчи ота-она!

Яқин-яқингача мактабда устозидан дашном эшитган ёки калтак еган ўқувчи уйига юрагини ҳовучлаб, қўрқиб борарди. Ота-онасига шикоят қилиш у ёқда турсин, бу гапни яширишга ҳаракат қиларди. Чунки ота-она устознинг томонини оларди: “Ўқитувчинг урган бўлса, демак, бир айбинг бор! Гўшти сизники, суяги бизники!” деган темир қонун ишларди. Натижада бола хатосини тушунарди, устозини ҳурмат қиларди ва тарбияли инсон бўлиб улғаярди.

Бугун: Мактабга умуман келмайдиган ота-оналар «Қаҳрамон»га айланди!

Ҳозир эса вазият 180 даражага ўзгарди. Бугун мактабда ўқувчига қаттиқроқ гапирган ёки унга танбеҳ берган ўқитувчи кун якунида уйига юрагини ваҳимага алдаб қайтмоқда. Нега дейсизми?

Чунки йил бўйи боласининг ўқиши, кундалиги, баҳолари ва хулқ-атвори билан умуман қизиқмайдиган, битта ота-оналар мажлисига вақт топмайдиган баъзи «замонавий» ота-оналар фарзандига бир марта қаттиқроқ гапирилса, гўёки дунё ағдаррилгандек жазавага тушиб мактабга етиб келишмоқда!

Боласининг тарбияси билан иши йўқлар, ўқитувчига «ҳуқуқ» ўргатиш бўйича профессор бўлиб кетишяпти!

Бу кетишда келажагимиз нима бўлади?

Ўқитувчини маҳалла, ички ишлар, директор ёки жазавадор ота-оналар олдида обрўсизлантириш — миллат келажагига болта уришдир. Боласининг тарбиясизлиги ва беодоблигини ҳимоя қилаётган ота-оналар аслида ўз фарзандининг келажагини барбод қилаётганини қачон тушуниб етади?

Бу кетишда эртага фарзандларимизга таълим ва тарбия берадиган жонкуяр устозларни қаердан топамиз? Кўзимизни очадиган вақт келмадими?!