Пекин ва Москва Эронни оёққа турғизмоқда: Ракета империяси кутилганидан тезроқ қайтмоқда!
Мако: Аввалги баҳолашларга зид ўлароқ, Эрон баллистик ракеталар ишлаб чиқаришни қайта тиклашни бошлади. Эндиликда Исроил ва АҚШ разведкаси Теҳроннинг ҳарбий саноатига етказилган зарар дастлаб даъво қилинганидан кўра анча енгилроқ бўлганини тан олмоқда.
Янгиланган разведка ҳисоботларига кўра, Эрон сақланиб қолган бутловчи қисмлар, қайта тикланган ишлаб чиқариш тармоқлари ва вақтинчалик ташкил этилган ер ости иншоотларидан фойдаланган ҳолда баллистик ракеталар, ракета учириш қурилмалари, ҳаво ҳужумидан мудофаа тизимлари ва дронларнинг чекланган ишлаб чиқарилишини йўлга қўйган. Исроил расмийларининг билдиришича, тикланиш суръатлари кутилганидан анча тез бормоқда.
Уруш пайтида блоклаб қўйилган туннеллардан кўплаб ракета учириш қурилмалари аллақачон чиқариб олинган. Аввалги баҳолашларда Эрон ракета учириш қурилмаларининг тахминан ярми йўқ қилингани айтилган бўлса-да, амалда уларнинг учдан икки қисми ишчи ҳолатда қолмоқда. Шунингдек, Эрон янги учириш қурилмаларини ишлаб чиқаришни ҳам бошлаган.
Ҳозирги вақтда Россия ва Хитой томонидан кўрсатилаётган кўмак Эроннинг қайта тикланиш ҳаракатларида муҳим рол ўйнамоқда — Теҳрон ракета ишлаб чиқариш учун энг муҳим бутловчи қисмларни олиш билан бир қаторда, Хитойдан кўчма зенит-ракета мажмуаларини ҳам қабул қилиб олмоқда. АҚШнинг йирик ҳажмдаги етказиб беришларни чекловчи денгиз блокадасига қарамай, Исроил расмийлари Эрон бир неча ой ичида ҳужумкор дронлар бўйича ўз имкониятларини тиклаши, бир йил ичида — балки ундан ҳам тезроқ — баллистик ракеталар ишлаб чиқаришни сезиларли даражада тезлаштириши мумкин деб ҳисобламоқда.
