Эрон олий раҳнамоси Мужтабо Хоминаий отаси оятуллоҳ Али Хоминаийнинг дафн маросимида иштирок этмади — The New York Times
5 июл куни Теҳронда оятуллоҳ Али Хоминаийнинг жаноза намози ўқилиши режалаштирилган. Видолашув маросими эса Эроннинг бешта шаҳрида бўлиб ўтади ва 9 июлгача давом этади. Ҳозиргача Эроннинг амалдаги олий раҳнамоси Мужтабо Хоминаий отаси билан видолашув маросимларида кўриниш бермаган.
Аввалроқ Али Хоминаийнинг дафн маросимини ташкил этиш қўмитаси раҳбари Акбар Пуржамшидиён маросимда Мужтабо Хоминаийнинг иштирок этиши унинг ваколатига кирмаслигини айтганди. Шунга қарамай, Хоминаийнинг кўплаб тарафдорлари уни дафн маросимида кўришга умид қилган.
Бироқ Исроилнинг уни ўлдириш ёки у яшаётган жойни аниқлаштиришга бўлган уринишлари туфайли Мужтабо Хоминаийнинг маросимда иштирок этиши эҳтимолини жудаям паст. Бу олий раҳнамо атрофидагиларининг режалари билан таниш бўлган Эрон Ислом инқилоби қўриқчилари корпусининг икки ходими анонимлик шарти билан The New York Times’га маълум қилди.
Манбалар, шунингдек, Эронни амалдаги олий раҳнамоси отасининг дафн маросимини ҳеч бўлмаганда баъзи қисмларида иштирок этиш истагини билдирганини айтди. У 9 июл куни Машҳад шаҳридаги имом Ризо зиёратгоҳида режалаштирилган дафн маросимида иштирок этишни ва отасининг ҳақига дуо ўқишни хоҳлаган.
АҚШ ва Исроилнинг 28 феврал куни Эронга қилган авиаҳужумларида оятуллоҳ Али Хоминаий ҳалок бўлганди. 1 март куни Эрон ҳукумати унинг ўлдирилгани расман тасдиқлаган эди.
