Ироқ Туркия орқали нефть экспортини кўпайтиришни режалаштирмоқда
Ироқ Туркиянинг Ўрта ер денгизидаги Жайҳон порти орқали нефть экспортини кунига 1,5 миллион баррелгача ошириш ниятида.
Бу ҳақда Ироқ нефть вазири Басем Муҳаммад Худайр маълум қилди.
Унинг таъкидлашича, Туркия билан имзоланган амалдаги келишув кунига 750 минг баррелгача нефть экспорт қилишни назарда тутади. Бироқ, томонлар шу йил ичида бу кўрсаткични икки баравар оширадиган янги келишув лойиҳасини ишлаб чиқиш ниятида.
Худайр Бағдод ва Анқаранинг нефть ва газ соҳасидаги ҳамкорлиги Жайҳон орқали нефть транзити билан чекланиб қолмаслигини таъкидлади. Унинг қўшимча қилишича, томонлар инвестициялар, Ироқдаги конларни ўзлаштириш ва нефть қазиб олиш ва қайта ишлашда Ироқ ва Туркия компаниялари ўртасида стратегик шерикликни ўрнатиш бўйича ҳам қизғин музокаралар олиб боришмоқда.
