Мессининг хайрлашув мактуби эълон қилинди
«Интер Майами» клуби форварди Лионель Месси Аргентина терма жамоасидаги фаолиятини якунлаш қарорига изоҳ берди.
39 ёшли жаҳон чемпиони мухлислар ва жамоадошларига очиқ хат эълон қилиб, унда миллий жамоадан кетиш қарорига қачон ва қандай шароитда келганини баён этди.
«Финалдан кейин ўтган вақт ва узоқ ўй-муҳокамалардан сўнг барчага шуни маълум қилмоқчиман: мен миллий терма жамоадаги фаолиятимни якунлаяпман… Бу қарор менга оғир тушди, ҳали ҳам оғриқли. Лекин тушуниб турибманки, айнан ҳозир энг тўғри пайт.
Ишонаман, мен доим бор кучимни берганман – фақат сўнгги йилларда эмас, биз ҳаммасини ютган пайтлардагина эмас, балки ундан олдин ҳам. Ҳар доим курашганман, шу форма учун боримни берганман, сизларга хурсандчилик улашиш, футбол орқали аргентиналик эканингиздан фахрланишингиз учун ҳаракат қилганман.
Энди фақат озгина вақт қолди. Боблар якунланади, бу боб эса жуда оғриқли. Миллий жамоада ўтказган ҳар бир дақиқамни яхши кўрганман ва доим яхши кўраман. Бор кучимни сарфладим. Энди берадиган нарсам қолмади. Қолаверса, ортимдан келаётган ёш, иқтидорли футболчилар бор – улар терма жамоада бўлишга муносиб», – деб ёзади Месси.
У ўз хатини шундай давом эттиради: «Сўнгги 20 йил давомида менга берган меҳрингиз учун раҳмат. Мен буни жуда соғинаман. Энди мен ҳам сизлардан бирига айланаман – трибунадан сизлар билан бирга қувонаман, сизлар билан бирга алам чекман.
Оиламга алоҳида раҳмат – доим ёнимда бўлгани, бу гўзал, аммо оғир сафарда мени қўллаб-қувватлагани учун. Ҳар бир мураббий, ҳар бир жамоадош ва менежерга миннатдорман – улар билан бирга ишлаш мен учун омад бўлди. Ўзим билан унутилмас хотиралар ва лаҳзаларни олиб кетаяпман.
Мен кетаяпман, лекин кўнглим хотиржам – сизларга ва жамоадошларимга бир неча эртакка ўхшаш онларни улашганимдан фахрланаман. Буларни сизлар билан бирга бошдан кечириш ажойиб бўлди. Сизларни яхши кўраман!
Тангрига шукр қиламанки, мен аргентиналикман. Олға, Аргентина!»
Месси хатининг охирида қуйидагиларни қўшимча қилди: «Изоҳ. Бу сўзларни 21 июл куни, жаҳон чемпионати финалидан икки кун ўтиб ёзганман. Бугун эса, отам билан боғлиқ воқеалардан кейин, бу қароримга аввалгидан ҳам кўпроқ ишонч ҳосил қилдим».
Эслатиб ўтамиз, Лионель Мессининг отаси Хорхе 8 август куни узоққа чўзилган касалликдан сўнг 68 ёшида вафот этди. Бизнесмен ва Мессининг кўп йиллик агенти бўлган Хорхенинг соғлиги жиддий ёмонлашгани ҳақидаги хабарлар 2026 йилги жаҳон чемпионати пайтидаёқ тарқалган эди. Шунинг учун ҳам футболчи турнирда Жазоирга қарши ўйинда жамоаси биринчи гол урганидан кейин майдонда кўз ёшларини тўхтата олмаганди.
