Эрон билан уруш қачон якунланади?
Трамп: Эрон билан уруш АҚШдаги ноябрь сайловларидан кейин якунланиши мумкин.
АҚШ президенти Дональд Трамп Эрон билан давом этаётган уруш ноябрь ойидаги оралиқ сайловлардан кўп ўтмай якунланиши мумкин, деб ҳисобламоқда.
«Менимча, уруш сайловлардан кейин дарҳол тугайди, чунки улар [эронликлар] энди қаршилик кўрсата олмайди», — деди Трамп.
Президентнинг айтишича, сайловлардан кейин нефть нархлари ҳам кескин пасайиши мумкин.
Трамп Техасга йўл олар экан, Эрон АҚШдаги сайловларга таъсир ўтказишга «жуда қаттиқ уринмоқда», деб даъво қилди. Унинг фикрича, Теҳрон ҳокимиятга «заиф» деб ҳисоблайдиган кучлар келишини ва улар Эронга аралашмасдан, ядровий қурол яратиш имконини беришини истайди.
Трамп аввалроқ еттинчи ойга чўзилган уруш атиги бир неча ҳафта давом этишини тахмин қилган эди. Бироқ можаро ва унинг оқибатлари, жумладан ёқилғи ҳамда озиқ-овқат нархларининг ошиши президентнинг рейтингларига салбий таъсир кўрсатди.
АҚШда оралиқ сайловлар 3 ноябрь куни бўлиб ўтади. Республикачилар Конгресс устидан назоратни йўқотиш хавфи остида. Тарихан АҚШда амалдаги президентнинг партияси оралиқ сайловларда парламентдаги ўринларининг бир қисмидан айрилиб келган.
