Зеленский Вашингтонни кескин танқид қилди
АҚШ президенти Дональд Трамп Россия президенти Владимир Путин билан Россия дизель ёқилғисини Америка ва жаҳон бозорларига етказиб бериш бўйича келишувга эришганини маълум қилди. Келишув давлат раҳбарларининг телефон орқали мулоқоти чоғида муҳокама қилинган.
Трампнинг сўзларига кўра, 300 минг тоннадан ортиқ дизель ёқилғиси зудлик билан етказиб берилиши керак. Ноябрь ойида яна 500 минг тонна, кейинчалик эса қўшимча бир миллион тонна ёқилғи етказиб бериш режалаштирилган. Россия ўзининг нефтни қайта ишлаш заводлари ҳолатидан келиб чиқиб, қисқа муддатда яна уч миллион тоннагача дизель етказиб беришга ҳам тайёр. Бироқ ушбу қўшимча етказиб беришлар муддати ҳозирча аниқланмаган.
Россия ёқилғисини амалдаги санкцияларга қарамай импорт қилишга рухсат бериш учун АҚШ Молия вазирлиги вақтинчалик лицензия берган. Унга кўра, Россия дизелини сотиш, етказиб бериш, тушириш ва импорт қилишга 2027 йил 7 апрелгача рухсат этилган.
Бу қарор Вашингтоннинг Россияга нисбатан аввалги сиёсати билан фарқ қилади. Сентябрь ойида Трамп Украинадаги уруш сабабли Россияга қарши янги санкциялар жорий этиш ваколатларини кенгайтирувчи қонунни имзолаганди.
Украина президенти Владимир Зеленский эса Москва билан эришилган келишувни танқид қилди. Унинг фикрича, санкцияларни юмшатиш «яққол заифлик» белгиси бўлиб, Россияга нефт маҳсулотларини сотишга рухсат бериш «Украинага қарши урушга сармоя киритиш» билан баробар.
Келишувга АҚШда ёқилғи нархининг ошиши ҳам таъсир кўрсатган бўлиши мумкин. Конгрессга оралиқ сайловларга бир ойдан кам вақт қолган бир пайтда бензин ва дизель нархининг кўтарилиши Республикачилар партияси учун сиёсий муаммога айланган.
Reuters маълумотларига кўра, АҚШда дизель ёқилғисининг ўртача нархи бир галлон учун 6,28 долларга етган.
