Роналду терма жамоадан четлатилиши мумкин
Португалия терма жамоаси сардори Криштиану Роналду миллий жамоа йиғинини муддатидан олдин тарк этгани учун интизомий жазога тортилиши мумкин. Унга нисбатан бир ойдан олти ойгача дисквалификация қўлланиши эҳтимоли бор. Бу ҳақда «Mirror» нашри хабар берди.
Маълум қилинишича, Португалия футбол федерацияси қоидаларига кўра, футболчига нисбатан автоматик равишда интизомий жараён бошланган. Энди жазо муддатини махсус интизомий кенгаш белгилайди.
Агар Роналду бир ойдан ортиқ муддатга дисквалификация қилинса, у келаси ой Дания ва Уэльс терма жамоаларига қарши ўтказиладиган Миллатлар лигаси учрашувларида иштирок эта олмаслиги мумкин.
ESPN маълумотларига кўра, интизомий кенгаш футболчининг узр сўрагани каби ҳолатларни ҳам ҳисобга олади. Шу сабабли унга нисбатан енгилроқ жазо тайинланиши эҳтимоли ҳам мавжуд.
Аввалроқ Роналду миллий терма жамоа йиғинини белгиланган муддатдан олдин тарк этган эди. Футболчининг таъкидлашича, бунга бош мураббий Жорже Жезушнинг ўз ваъдаларини икки марта бажармагани сабаб бўлган.
Роналду Уэльсга қарши 1:0 ҳисобида якунланган баҳсда майдонга тушган, аммо Норвегияга қарши 2:1 ҳисобидаги учрашувда захирада қолдирилган. Унинг сўзларига кўра, дастлаб мазкур ўйинда иштирок этиши режалаштирилмаган. Бироқ мураббий зарурат туғилса, 30 дақиқа давомида ўйнашга тайёр туришини сўраган. Шунга қарамай, футболчи учрашувда майдонга туширилмаган.
Маълумот учун, Криштиану Роналду фаолияти давомида беш марта «Олтин тўп»ни қўлга киритган ва Чемпионлар лигасида беш бор ғолиб бўлган. Шунингдек, у Португалия терма жамоаси билан Европа чемпионати ва Миллатлар лигасида чемпионликни нишонлаган.
Роналду 2022 йил декабрь ойидан буён Саудия Арабистонининг «Ал-Наср» клубида тўп сурмоқда. Манбада келтирилишича, у фаолияти давомида жами 980 та гол урган. Шундан 834 таси клублар сафида, 146 таси эса Португалия терма жамоасида қайд этилган.
